أنا اسمي أمل دارسة علم نفس في كتير تحديات بحياتي بحكم ولدت بمجتمع شرقي وبعتبر وحدة من التحديات هو أني بعمر ٢٦ قررت العب ملاكمة (بوكسينغ) كان في أشخاص داعمين ومحترمين قراري وأشخاص رافضين الفكرة وخصوصي أنو نوع الرياضة يلي اخترتا بتتضارب مع مهنتي واختصاصي بمجال علم النفس.

هلا ليش قررت العب ملاكمة ببداية الطريق كنت عم دور على رياضة فيها تفريغ لأن كنت مكتئبة وتعبانة ويأسانة من الحياة والدما والحرب وبنفس الوقت كان في كتير دراسات مشجعة بتقول أن النشاط العضلي بيساعد على إطلاق الأندروفين ومواد كيميائية طبيعية موجودة في الدماغ بتساهم بتحسين الحالة المزاجية، وبنفس الوقت بتساعد الرياضة على التخلص من الأفكار السلبية والمشاعر وشغلة كتير مهمة أنو الرياضة بتخلق فرصة للتفاعل مع الآخرين والتعرف على أشخاص جدد بحياتنا.

وابتدأ المشوار وابتدأ التحدي وقت كنت اركد بالملعب، وادرب بصالة الملاكمة كنت شوف نظرات، منها استهزاء، استغراب، غضب، فرح، تفاؤل الفرح والتفاؤل كنت شوفوا بعيون الأطفال ويجو يقلولي خالة عنجد أنتي بتلعبي ملاكمة! قلن أي يضحكوا ويروحوا 

ماعد اكتفيت انو أنا بس بلعب ملاكمة صرت بدي شارك بالبطولة كمان ما قدرت شارك غير ببطولتين وربحت وهاد الشعور كان كتير رائع، بعد الربح صرت بدي كمل الطريق وعملت دورة مدرب وصار عندي أطفال حلوين ورائعين صرت دربن طبعاً درب الأطفال ملاكمة ولاحظ الأطفال اذا عندن مشاكل اتواصل معن، والحلو صارو أهلي والمحيط يدعموني، وقت نوثق بحالنا ونعبر عن حاجتنا، ونضل متمسكين بالشي يلي بنحبوا ومنحب نعملوا رح نفرض عالمجتمع وعالأشخاص يحترموا قراراتنا ويأمنوا بقدراتنا كفرد 

بحب قول لكل صبية أنتي قادرة تكوني ....وين بتحبي تكوني بس وثقي بحالك... حبي حالك ....بليق فيك النجاح

أمل..